Ubisoft嘅射擊遊戲《 Rainbow 6》第8賽季喺6月11日開始,由4個地區 – 亞太區、歐洲區、拉丁美洲區、北美洲區嘅各個戰隊,爭取出線每區兩個嘅總決賽出戰名額,而呢8隊嘅強者就會喺11月17至18日,巴西里約奧林匹克體育館進行決賽,共同爭奪高達27萬5千美元嘅總獎金。呢個數字可以話係將本年度嘅職業電競聯賽全年總獎金,提高到140萬美元嘅新紀錄,不得鳥呀!

講到巴西,就要提提巴西戰隊 Team Liquid,喺上個星期就打低咗澳洲嘅 Fnatic、法國嘅Millenium、同埋大熱嘅歐洲區戰隊 PENTA Sports,如果今個賽季可以順利咁打入決賽,喺家鄉巴西捧走獎盃相信會係一件可以實現嘅事!

第8賽季亦都會有新賽規,其中一樣就係「Pick and Ban」,雙方隊伍可以選擇一名攻擊員同防守員並禁用,令賽事有更大嘅變化;而呢個功能亦會引入到自訂PvP模式,令所有玩家都可以用到呢個新賽規。賽事愈嚟愈精彩,大家又睇好邊隊出線?

相關新聞