大家有玩過甚至可能聽過下LoL都應該知，一場game，十條友，一橫一直，一人一路（唔計下路），而jungle從來都係孤家寡人……誰不知RNG喺對上呢個星期五同老對手EDG打到去第三局嘅時候，癲到出哂Karsa同MLXG兩個jungle選手，實行「有大食大」！
Karsa同MLXG分別玩輔助角色Braum同進攻角色Graves，一攻一守，聽落好似同「一帶一路」有得揮。比賽其實一路都處於拉鋸狀態，直至去到35分鐘嘅時候，兩邊喺巴龍位置拉扯，RNG搵到機會食咗條巴龍不特止，仲要打咗波1換3嘅團戰，MLXG嘅Graves喺呢波團戰直接攞咗個三連殺，真係肥過肥仔水。
結果大家可想而知啦，正所謂兵敗如山倒，RNG順利埋單，MLXG仲一個唔小心，以8殺、2死、6助攻嘅成績，拎埋呢場嘅MVP，睇嚟RNG已經唔再係一支只係靠Uzi嘅隊伍啦！
