ASUS ROG喺剛開始嘅台北 Computex Taipei 2018中,正式公開咗佢哋第一部電競手機!HeaHa即刻同你匯報一下佢有乜野咁好玩!

首先手機規格完全係旗艦級:2.96GHz嘅高通Snapdragon 845 CPU超頻版、8GB RAM同內置最高512GB 儲存空間,真係唔使驚唔夠位裝Game;而所應用嘅散熱系統就據稱可以令CPU嘅高速運作時間提升5倍,激戰緊嗰時就啱晒啦!

ASUS ROG電競手機有一個名「 AirTriggers 」嘅功能,係專為手遊玩家而特設;簡單啲講,就係以超音波感測嘅方式,將手機嘅右側面變成類似手掣嘅「L1/ R1」鍵,而且可以設定喺個Mon嘅任何位置,咁就可以更快做出想做嘅動作!

玩住叉電應該係大部份手遊玩家嘅習慣,所以呢部機喺左側面有一個連接口,配合番佢個配件,打橫拎住部機打機嗰陣,隻手就唔使被條叉電線阻住晒啦!

仲有好多呢部手機先有嘅特別配件,例如可以變做兩個Mon嘅TwinView Dock、將手機畫面以Wifi傳送到大螢幕嘅WiGig Dock等等…..不過,追加當然要另外收費啦。

呢部機幾時見街?價錢呢?有預計係7月,價錢就可能係$9,000內,唔知大家又點睇呢?

相關新聞