行行出狀元！讀書唔成，打機叻照樣搵到食！電競選手點入行？每個月可以賺幾多？一齊聽吓《英雄聯盟》世界冠軍Toyz有咩講！
早前，香港環境師學會、英皇電競同香港精算扶輪社合辦咗一場青年就業講座，邀請咗英雄聯盟世界冠軍Toyz分享電競行業發展及青年人嘅另類出路，而美聯物業同我哋Heaha媒體亦都係支持機構之一！
香港環境師學會潘景和先生(左)、《英雄聯盟》世界冠軍陳偉健Toyz(中)
、楊振華議員(右)
讀書唔成 =/= 廢青
當年高中畢唔到業，16歲就輟學嘅Toyz，喺人哋眼中係一名廢青，除咗識打機之外，仲識做啲乜？但原來只要有一樣野你係好鍾意做，好認真咁做，就算係打機都可以搵到出路！
起初Toyz只係好鍾意玩《英雄聯盟》呢款遊戲，同朋友報名參加業餘比賽，咁啱贏咗當時台灣唯一一支職業隊，因為受到對方嘅賞識而被邀請加盟到旗下，加上當其時嘅工作搵唔到食，於是就膽粗粗走咗去台灣發展。「畀咗一年時間自己去嘗試下呢個行業究竟係咪真係適合我，因為如果做唔到其實係浪費緊時間，亦覺得當時加入呢個職業圑隊係有少少逃避現實，我係咪真係贏到呢，我真係唔知，但我想嘗試下，咁啱喺呢一年又贏到世界冠軍。」
打機無「錢」途？隨時搵五、六萬蚊一個月！
打機係咪真係搵到食？好多人都好好奇電競選手到底每個月可以賺幾多？Toyz就話佢當年(2011年)平均收入水平接近1萬至2萬港幣左右，但宜家職業選手嘅人工可能已經跳到2萬至3萬蚊，一線選手甚至搵緊5、6萬蚊一個月，至於再勁啲嘅選手去到中國發展，人工更有機會去到20至30萬蚊不等。Toyz又指選手嘅收入同知名度掛鉤，因為電競業本身需要靠網絡直播呢個行業扶持，選手知名度高自然可以喺直播中爭取更多嘅曝光率，直接影響收入。
入行門檻低！條件係你要真係好熱愛打機！
Toyz：「我覺得電競呢個行業就係因為太新，所以大家都唔係好知點入行，但係亦都因為佢好新，加上對學歷嘅要求唔太高，你唔需要特別搵方法去入行，只要你對呢方面好有興趣，你一定可以從中搵到相關嘅工作。」不過Toyz亦坦言香港目前可以提供到嘅就業途徑相對較少，因為相關嘅電競公司為數不多，而且選手嘅角色比較被動，通常要等一啲公司或者教練好似星探咁去發拙佢哋。
電競選手壽命短！打機打唔到一世？
電競選手嘅職業生涯同運動員一樣咁短暫，黃金期一般係17至25歲，但唔代表過咗呢段時期，選手嘅人生就此結束，好似Toyz咁，由一個職業選手升格為教練，再擁有自己嘅隊伍，到帶領個人隊伍加盟到英皇電競，甚至宜家做埋技術總監，證明電競呢條路其實可以行得好遠！而且喺呢個行頭裡面，除咗電競選手之外，對其他職位同樣有需求，例如教練、分析師、比賽搞手及PR等等，所以絕對唔會冇出路。
選手想發展一定要衝出香港？
以亞洲區嚟講，台灣、南韓一早已經領先緊香港，加上香港喺電競界可以投放嘅資金又唔及中國充裕，所以大部分香港選手都會選擇到國外發展。Toyz慨嘆要留住人才有一定困難，主要原因係香港市場細，投資者少，好難舉辦到本地嘅大型聯賽，選手冇地方發揮，自然往外走。所以Toyz亦都表示英皇電競嚟緊嘅目標就係希望可以喺本地舉辦一個好專業嘅聯賽，藉此將一啲本港嘅年青人帶返嚟香港發展，喺聯賽發掘佢哋，再培訓佢哋成為新血。
