一聽到Red Bull呢個名，除咗「送你一對翼」之外，第一件事一定係諗起X games（極限運動），想當年小編臨渴掘井「咪書」嗰陣都係靠Red Bull，雖然我啲成績都係冇起飛⋯⋯但家陣Red Bull除咗X games之外仲撈埋電競，簽咗Ninja幫佢造勢之餘仲推埋Fortnite比賽《Red Bull Rise Till Dawn》。
賽事將會喺芝加哥Willis Tower嘅99樓進行， 而Ninja亦會係其中一個參賽者，玩家要喺7月21日嘅日落時間一路打到第日嘅日出，真係名符其實Rise Till Dawn。獎金總共有5000美金，話多唔多，話少唔少，如果大家有心有力嘅話，不妨買張機票過去搏一搏，喺99樓睇下日出，到時賺咗張機票不特止，分分鐘仲有賺添。
