《爐石戰記》2018世界大賽今日(17/7)正式展開!48支國家/區域代表隊將會參與歷時6星期嘅積分循環賽,最終Out淨16隊,進入下一輪。上屆香港隊以2-3飲恨淘汰,究竟今次有冇機會一雪前恥,就要睇吓今屆嘅陣容實力去到邊!

香港隊代表分別有blitzchung、losefield、kin0531同Shy。上屆比賽kin0531都有份落場,唔單止累積咗前賽嘅經驗,佢今年又以東亞組第一攞咗亞運參賽資格,仲拎埋亞太區夏季賽第六名、首爾站八強同雪梨站八強,可以話狀態大勇!拍住去年喺台港澳精英賽贏得亞軍,擅長快攻嘅種子Blitzchung,仲有16年WESG亞太區冠、亞軍嘅losefield同Shy出戰,相信今年嘅成績唔會差得過舊年。

至於競爭對手之一嘅中國隊嘅陣容又係點呢?

中國隊成員包括Leaoh、OmegaZero、Trunks同 YouLove。雖然去年OmegaZero帶住中國隊殺入八強,但中國選手始終少同國外選手比賽,好難評論佢哋嘅實力。OmegaZero打過2016、17兩年世界賽,雖然冇獎攞,但國際賽事經驗已經叫做豐富過其他隊員;至於冇參加過任何國外比賽嘅YouLove,自然就顯得輸蝕咗啲;而今年中國積分最高嘅選手Leaoh,夏季季後賽嘅表現亦都麻麻,似乎中國隊都存在隱憂,到底佢哋今年keep唔keep到水準?真係要睇落去先知。

資料來源:tw.esports.yahoo.com

相關新聞